ကားဟောင်းများ ပယ်ဖျက်ကာ ကားသစ် တင်သွင်းခွင့်ပြုခြင်း အစီအစဉ်အား ကြေညာချက် ထုတ်ပြန်ရာတွင် လုပ်ငန်းရှင်၊ ကုမ္ပဏီအပါအ၀င် နိုင်ငံခြားတွင် သွားရောက် အလုပ်လုပ်ကိုင်နေသူများအား တစ်ဦးချင်းကား တင်သွင်းခွင့်ပြုသည့် အစီအစဉ်ပြီးမှ ကားအရောင်းပြခန်း (Showroom) ဖွင့် ခွင့်ပြုမည့် အစီအစဉ်အား အစဉ်လိုက် ထုတ်ပြန်ထားပြီး အဆိုပါ အစီအစဉ်မှာ ပြောင်းပြန်မဖြစ်ရန် လိုသည်ဟု ကားတင်သွင်းမည့်သူများက ဆိုသည်။
အဆိုပါ အစီအစဉ်၏ ပြောင်းပြန်အနေအထားShowroom ဖွင့် ခွင့်ပြုပြီးမှ လူတစ်ဦးချင်း ကားတင်သွင်းခြင်းအား တစ်ဆင့်ချင်းဆောင်ရွက်ရန် ရှိသည်ဟု နေပြည်တော်ရှိ စီး ပွားရေးနှင့် ကူးသန်းရောင်းဝယ်ရေး ၀န်ကြီးဌာန တာဝန်ရှိသူများက အောက်တိုဘာလ ၈ ရက်နေ့တွင် ကျင်းပသည့် ကားတင်သွင်းခြင်းဆိုင်ရာ သတင်းစာရှင်းလင်းပွဲတွင် ပြောကြားခဲ့သည်။
စက်တင်ဘာလ ၁၁ ရက်နေ့က နေပြည်တော်တွင် ကျင်းပသည့် သက်တမ်းကြာမြင့်နေသည့် ကားဟောင်းများ ပယ်ဖျက်ကာ ကားသစ်တင်သွင်းရေး နှင့် ပတ်သက်၍ ပြုလုပ်သည့် ဆွေးနွေးပွဲတွင် ရထားပို့ဆောင်ရေး ၀န်ကြီးဌာန မှ ကားဟောင်းပယ်ဖျက်ရေးနှင့် အစားထိုးယာဉ် တင်သွင်းရေး၊ တစ်ဦးချင်း ကားတင်သွင်းခွင့်ပေးမည့် ကောင်းမွန်သော အစီအစဉ်များကို အစဉ်လိုက် ထုတ်ပြန် ပြောကြားခဲ့ပါသည်။
ထို့သို့ ထုတ်ပြန်ရာတွင် ကားဟောင်းများအား အသုတ်လိုက် ကာလ အပိုင်းအခြားဖြင့် လဲလှယ်ပေးမည့် အစီအစဉ် ပြီးစီးလျှင် နိုင်ငံခြားပို့ကုန်လုပ်ငန်း၊ ဟိုတယ်ခရီးသွားလာမှု လုပ်ငန်း၊ ရင်းနှီးမြှုပ်နှံမှုလုပ်ငန်း လုပ်ကိုင်သူများ၊ နိုင်ငံခြားတွင် တရားဝင်သွားရောက် အလုပ်လုပ်နေသူများနှင့် သင်္ဘောသားများကိုလည်း နိုင်ငံတော်ဘဏ် များတွင် တရားဝင် နိုင်ငံခြားငွေ စုဆောင်းထားရှိပါက ကားတင်သွင်း ခွင့်ပြုခြင်း အစီအစဉ်ကို ဖော်ပြထားပြီး ထိုသို့ပြီးစီးမှသာ ကားအရောင်းပြခန်း ဖွင့်လှစ်ခွင့်ပြုခြင်းနှင့် အနာဂတ်တွင် အများပြည်သူအား လွတ်လပ်စွာကား တင်သွင်းခွင့်ပြုခြင်းအထိ အစီအစဉ် အတိုင်း နိုင်ငံပိုင်သတင်းစာများတွင်ပါ ထည့်သွင်းဖော်ပြထားသည်။
လုပ်ငန်းရှင်ဆိုပါက မိမိ၏ နိုင်ငံခြားငွေ ဘဏ်စာရင်းတွင် အမေရိကန် ဒေါ်လာတစ်သိန်းနှင့် အထက်ပြသလျှင် ကားတစ်စီး တင်သွင်းခွင့်ပြုမည် ဖြစ်ပြီး ပြည်ပတွင် နိုင်ငံခြားငွေရရှိရန် အလုပ်လုပ်ကိုင်နေသူများ ဆိုပါက မိမိ နိုင်ငံခြားငွေ ဘဏ်စာရင်းတွင် ဒေါ်လာ ၃၀၀၀၀ ပြသရမည်ဖြစ်ကြောင်း၊ ထိုသို့ ဆိုပါက ကားတင်သွင်းခွင့်ပြုမည်ဖြစ်ကြောင်း ထုတ်ပြန်ထားသည်။
သို့သော် ယခုအခါ အဆိုပါ တင်သွင်းခွင့်ပေးမည့် အစီအစဉ်မှာ မည်သည့်အချိန်တွင် စတင်မည်ဆိုသည်ကိုပင် အတိအကျ မထုတ်ပြန်နိုင်သေးပဲ ထိုအစီအစဉ်ပြီးမှ ဖွင့်ခွင့်ပေးရန် ထုတ်ပြန်ထားသည့် အရောင်းပြခန်း အစီအစဉ်မှာရှေ့သို့ ရောက်လာကြောင်းလည်း သိရသည်။
“ပထမအဆင့် ကားဟောင်းတွေ ကို လဲလှယ်ပေးပြီး ကားပါမစ်ပြုပေးတဲ့ အစီအစဉ်ကို ဆောင်ရွက်နေပါတယ်။ ဒုတိယအဆင့်Showroom ဖွင့်ရောင်းချဖို့ကိုလည်း စီစဉ်ဆောင် ရွက်နေတာဖြစ်ပါတယ်။ လက်ရှိမှာတော့Showroom ဖွင့်ခွင့်ကို အခု ဖြေကြားတဲ့အထိ ဘယ်ကုမ္ပဏီ ဘယ်ပုဂ္ဂိုလ်ကိုမှ ခွင့်ပြုပေးထားခြင်း မရှိသေးပါဘူး။ အခု ပထမအဆင့် အနေနဲ့ ကားဟောင်းတွေ အစားထိုးလဲလှယ်ရေး အစီအစဉ်အတွက်Showroom ဖွင့် ရောင်းချမှုပြုနိုင်ဖို့ လုပ်ငန်းစဉ်တွေ ရေးဆွဲပြီး လေ့လာတင်ပြထားဆဲ ဖြစ်ပါတယ်။Showroom ဖွင့်ဖို့ လာလျှောက်ထားတာ အစောင် ၃၀ ကျော် ရှိနေပါပြီ။ ဆက်လက်လည်း လျှောက်ထားဆဲ ဖြစ်ပါတယ်။ ခွင့်ပြုမိန့်ရတဲ့ အချိန်မှာ ဆက်လက်ဆောင်ရွက် ပေးသွားမှာပါ။ ဆက်လက်ပြီး လုပ်ငန်း ရှင်၊ ကုမ္ပဏီနဲ့ နိုင်ငံခြားငွေရအောင် ပြည်ပမှာ အလုပ်လုပ်ကိုင်တဲ့ နိုင်ငံသား၊ နိုင်ငံခြား သင်္ဘောသားတွေကို လည်း ပါမစ်ထုတ်ပေးဖို့ အစီအစဉ်ကိုလည်း ဆက်လက်ပြီး တစ်ဆင့်ပြီးတစ်ဆင့် ဆောင်ရွက်ပေးသွားမှာပါ။ နိုင်ငံတော်အတွက် နိုင်ငံခြားဝင်ငွေရှာပေး နေတဲ့ နိုင်ငံသားတွေဖြစ်လို့ သူတို့ အတွက်အစီအစဉ်လည်း ဆက်လက် ဆောင်ရွက်သွားမှာ ဖြစ်ပါတယ်”ဟု စီးပွားရေးနှင့် ကူးသန်းရောင်းဝယ်ရေး ၀န်ကြီးဌာန တာဝန်ရှိသူတစ်ဦးက အောက်တိုဘာလ ၈ ရက်နေ့တွင် ကျင်းပ သည့် ကားတင်သွင်းခွင့်များနှင့် ပတ်သက်သည့် သတင်းစာရှင်းလင်းပွဲတွင် ပြောကြားခဲ့ပါသည်။
ယခုအခါ အဆိုပါဝန်ကြီးဌာန များစုပေါင်း၍ အများပြည်သူအတွက် ချမှတ်ထားသော အစီအစဉ်မှာ အစီအစဉ်အတိုင်းမဟုတ်ပဲ ပြောင်းပြန် ပြန်ဖြစ်ကြောင်း၊ အစီအစဉ်အတိုင်းသာ တစ်ဦးချင်း ကားတင်သွင်းခွင့်ပြုပြီးမှ အရောင်းပြခန်း ဖွင့်လှစ်သင့်ကြောင်း၊ သို့မှသာ ဈေးနှုန်းချိန်ညှိနိုင်ပြီး လက်ဝါးကြီးအုပ်စနစ်မှ လွတ်ကင်းမည်ဖြစ်ကြောင်း ကားတင်သွင်းမည့်သူများက သုံးသပ်ပြောကြားခဲ့ကြသည်။
“နိုင်ငံတော်က ရထားပို့ဆောင်ရေး ၀န်ကြီးဌာန အပါအ၀င် ၀န်ကြီးဌာနတွေ စုပေါင်းပြီး အစီအစဉ်ကောင်း တွေချမှတ်ခဲ့တယ်။ အခုစီးပွားကူး သန်းကပြောတဲ့အတိုင်းဆို အစီအစဉ် ကရှေ့နောက်လွဲသလိုဖြစ်နေတယ်။ လူတစ်ဦးချင်းကား တင်သွင်းခွင့် ပေးပြီးမှ အရောင်းပြခန်းဖွင့်သင့် တယ်။ ဒါမှ တစ်ဦးချင်းတင်သွင်းတဲ့ ဈေးမှန်ကို သိမယ်၊ အဲဒီဈေးမှန်ကို အခြေခံပြီး အဲဒီထက်အများပြည်သူ သက်သာအောင် ရောင်းနိုင်မယ့်သူမျိုး ကို အရောင်းပြခန်း လာဖွင့်ခွင့်ပေးရမယ်။ ဒါက အစီအစဉ်ကောင်းပဲ။ ရထား ပို့ဆောင်ရေးဝန်ကြီးဌာနနဲ့ MIC ဥက္ကဋ္ဌ တို့ကလည်း အစကတည်းက ဒီလိုပဲ စဉ်းစားချပေးခဲ့တာလို့ မြင်ပါတယ်။ တစ်ကယ်လို့ လူတစ်ဦးချင်းတင်သွင်းတာထက် ကုန်ကျစရိတ် အရမ်းသက်သက်သာသာနဲ့ အများပြည်သူဝယ်စီးရ မယ်ဆိုတဲ့ အရောင်းပြခန်းမျိုးဆိုရင်တော့ အရင်ဖွင့်ပေါ့။ ဒီလိုမှမဟုတ်ပဲ လူနည်းစု၊ ဈေးညှိလို့ရတဲ့ ကုမ္ပဏီ ၂၀၊ ၃၀လောက်ပဲ ဖွင့်ခွင့်ပေးရင်တော့ လက်ဝါးကြီးအုပ်တာမျိုးပဲ ပြန်ဖြစ်လာနိုင် တယ်”ဟု ကားတင်သွင်းမည့် လုပ်ငန်းရှင်တစ်ဦးက ပြောကြားခဲ့သည်။
“အခွင့်ထူးခံတွေ ကားနဲ့ပတ်သက်ပြီး လုပ်စားနေတာ ၁၅ နှစ်လောက်ရှိ ပါပြီ။ ကျွန်တော်တို့လို သာမန်လူလတ်တန်းစားတွေကို ဒီတစ်ခါတော့ လွတ်လွတ်လပ်လပ် ကားဝယ်ခွင့်ပေးပါဗျာ။Showroom ကို အရင်ချပေးမယ်ဆိုရင် ခင်ဗျားတို့ဂွင်ရိုက်၊ ၀အီ တော့မှကျွန်တော်တို့ကို သွင်းခွင့်ပေး တာတော့ မဖြစ်သင့်ဘူး။ အခုသင်္ဘော ပြန်ဆင်းလာတဲ့ငွေလေးနဲ့ ကားအသစ် ကလေးတစ်စီးဝယ်ချင်တယ်ဗျာ”ဟု သင်္ဘော ကပ္ပတိန်တစ်ဦးကလည်း ပြောကြားခဲ့သည်။
“ရထားပို့ဆောင်ရေးဝန်ကြီးဌာနက ထုတ်ပြန်ထားတဲ့ အစီအစဉ် နဲ့ စီးပွားကူးသန်းက ပြောတဲ့အစီအစဉ် ဘာကြောင့်လွဲသလဲ သိချင်ပါတယ်။ ဘာပဲဖြစ်ဖြစ် သွေးရိုးသားရိုး ကွဲလွဲမှုပဲ ဖြစ်စေချင်ပါတယ်။ ကားကောင်းလဲစီးဖို့ လုပ်နေတဲ့သူတွေ အများကြီးပဲ။ သူတို့ကိုနောက်ရွှေ့ ပြီးShowroom ဖွင့်ဖို့ကို အရင်ရှေ့တင်တယ်။ အများပြည်သူလည်း ကားကောင်းစီးချင်ကြပါတယ်။ ဒီအစီအစဉ်ကို ကြိုက်ပါတယ်။ ဒါပေမယ့် ချမှတ်ထားတဲ့ အစီအစဉ်ကောင်း အပေါ်မှာမှ ကန့်သတ်ချက်ပေါင်း များစွာထပ်ရှိတဲ့အတွက် အများပြည်သူ ကားကောင်းကောင်း မစီးစေချင်တဲ့ သဘောလိုဖြစ်နေတယ်။ ကားသစ် တွေကို နိုင်ငံတကာစံနှုန်းနဲ့အညီ မစီးနိုင်ကြဘူး။ အစိုးရက စေတနာနဲ့ ချပေးတယ်၊ တစ်ချို့က မလိုအပ်ပဲ စည်းကမ်းချက်တွေ အများကြီးထုတ်ပြီးလုပ်ကြတယ်။ ကျွန်တော်တို့ ဘာကြောင့် ကားနဲ့ပတ်သက်တဲ့ သတင်းတွေမှာ ထောက်ပြနေရတယ်ဆိုတာ ရှင်းရှင်းလင်းလင်း သိစေချင်တယ်။ Showroom အရင်ဖွင့်ပြီး ဈေးကြီး ကြီးတင်ခဲ့ရင် ဒါဟာ အများပြည်သူကို ကားကောင်းကောင်းမစီးစေချင်လို့ လက်ဝါးကြီးအုပ်ချင်လို့ပဲ။ ကျွန်တော်တို့ ထောက်ပြတယ် ဆိုတာတောင် ကိုယ်တွေ့ကြုံမှ သက်သေ အထောက်အထား ခိုင်လုံမှ ထောက်ပြလို့ရတာပါ” ဟု Weekly Eleven ဂျာနယ်မှ အယ် ဒီတာချုပ် ကိုဝေဖြိုးကပြောကြားခဲ့ပါသည်။
“ဈေးမှန် ဘယ်ဈေး၊ အခြေခံ ဈေးက ဘာကိုယူမယ်၊ ကိုယ့်ပြည်သူတွေ သက်သာမယ်ဆိုတာမျိုး သေချာမလုပ်ရသေးပဲ အရောင်းပြခန်းဖွင့် ခွင့်ပေးရင်တော့ စက်သုံးဆီ အရောင်းဆိုင်တွေလို လက်ဝါးကြီးအုပ် ဈေးကွက်ပဲ ဖြစ်မှာပဲ။ ဒီနေ့ ဒေါ်လာဈေး တက်တယ်ဆိုရင် နောက်နေ့စက်သုံးဆီဈေးတွေကို ချက်ခြင်း ခုန်တက်လိုက်ကြတယ်။ နိုင်ငံတကာ ဈေးကျတယ်၊ ဒေါ်လာဈေးကျတယ် ဆိုရင်တော့ အရင်အမြင့်ဈေးနဲ့ ၀ယ်ထားတာတွေ မကုန်သေးလို့ဆိုတဲ့ အကြောင်းပြချက်နဲ့ တစ်ပတ်လည်း မကျ နှစ်ပတ်လည်း မကျနဲ့ နောက်ထပ် ဒေါ်လာဈေးပြန်တက်တဲ့အထိ အချိန်ပြန်ဆွဲ လိုက်ကြသေးတယ်။ ဈေးပြန်ချပေးတယ် ဆိုတာတောင် နိုင်ငံတကာဈေး နဲ့ယှဉ်ရင်မြင့်နေသေးတာပဲ။ ဒါက ဈေးညှိလို့ရနိုင်တဲ့ လူနည်းစုကိုပဲ ချပေးခဲ့လို့ပါ။ အခုလည်း အဲဒီလိုပဲ အရင်က ကားတင်သွင်းမှုနဲ့ အကျိုးအမြတ်ကြီးခဲ့တဲ့ ရရင်ရသလို အခွင့် အရေးယူခဲ့တဲ့ လုပ်ငန်းရှင်တွေကိုပဲ ဖွင့်ခွင့်ပေးမယ်ဆိုရင် ဈေးညှိလို့ရတဲ့ လူနည်းစုကိုပဲ ပေးမယ်ဆိုရင် ကျွန် တော်တို့ကတော့ လက်ဝါးကြီးအုပ်ခံရတဲ့ အနေအထားနဲ့ပဲ ကြုံကြရမှာပဲ။ အခုကားကိစ္စလည်း ဒီလိုပဲကောင်းပါတယ်ဆိုတဲ့ အစီအစဉ်တွေကို အပေါ်ကချတယ်။ အောက်က အဆင့်ဆင့်ရှုပ်ထွေးတဲ့ စနစ်တွေပြန်ထား လုပ်ကြတော့ ခက်ကုန်တာပေါ့။ အခု အရောင်းပြခန်း အရင်ဖွင့်ရင်တော့ ဖွင့်ခွင့်ရတဲ့သူတွေက ရသမျှအရင် ဈေးတင်ပြီးလုပ်ကြဦးမှာပဲ။ လူတစ်ဦးချင်းကို အရင်ပေးတာက အရင်ဆုံး ဈေးမှန်အခြေခံဈေးကို ရရှိစေတယ်။ သူတို့ထက် သက်သာတဲ့ ဈေးနဲ့ ဖွင့်ခွင့်ပေးမှ အများပြည်သူ တစ်ကယ် မသက်သာဘူးလား။ အခုShowroom ဖွင့်ခွင့် လျှောက်ထားတာ အစောင် ၃၀ ကျော်ရှိတယ်ဆို တာတောင် ခုမှ သိကြရတာ။ ဘယ်တုန်းက လျှောက်ခွင့်ပေးမှန်းတောင် လုပ်ငန်းရှင်အများစု မသိရဘူး”ဟု ပို့ကုန်လုပ်ငန်းရှင် တစ်ဦးက ဆိုသည်။
“နှစ်ပေါင်းများစွာ အခွင့်ထူးရနေတဲ့ Cronies တွေဟာ ခေတ်ပြောင်းစနစ်ပြောင်းမှာ ခုထက်ထိ အကျင့် မပျောက်နိုင်ကြသေးပဲ လူထုကို ဂုတ်သွေးစုပ်ဖို့ ကြံနေတုန်းပဲ။ အရင်တုန်းက ကားကို ဦးပိုင်နဲ့ မြန်ဂုဏ်မြင့်တို့နဲ့ ပိုင်တဲ့သူတွေကတစ်ဆင့် ဈေးကြီးပေး အောက်ကျခံဝယ်ရတယ်။ ကားသွင်းခွင့်ရတဲ့ အခွင့်ထူး ခံတွေက ကား ၁၀ စီး ၁၅ စီးလဲ လှယ်စီးနေတဲ့အချိန်မှာ သာမန် လူလတ်တန်းစားတွေက အစုတ်တွေနဲ့ လက်လုပ်လက်စားတွေက ဘတ်စ်ကားအစုတ်တွေနဲ့၊ အခုခေတ်ပြောင်း ပြီ။ သူတို့ကို ဒီအခွင့်အရေးမျိုးထပ် မပေးသင့်တော့ဘူး။ ဒါကြောင့် လူ ၃၀-၄၀ စုဖွဲ့ပြီး Showroom တွေ အရင်ဖွင့်ပြီး လက်ဝါးကြီးအုပ် ကားသွင်းတာကို ကန့်ကွက်ပါတယ်”ဟု Weekly Eleven ဂျာနယ်မှ အယ်ဒီတာချုပ် ကိုဝေဖြိုးက ပြောကြားခဲ့ပါသည်။
No comments:
Post a Comment